Ondoen diseinatutako egunkariei nazioarteko sariak

Guztira, 5 sari handi (“Munduko diseinurik onenak”), 22 Urrezko sari, 66 Zilarrezko sari eta 848 Aipamen berezi banatu ditu informazioen diseinuan hobekuntza bultzatzen duen elkarteak, SNDk.

Honako bost egunkari hauek jaso dituzte “Munduko diseinurik onenak” sariak:

• The Independent on Sunday, London, Erresuma Batua.
• San Jose Mercury News, California, Ameriketako Estatu Batuak.
• The Virginian-Pilot, Norfolk, Virginia, Ameriketako Estatu Batuak.
• Die Zeit, Hamburg, Alemania.

eta 24.999 edo tirada txikiagokoen artean:

• Palabra, Saltillo, Mexico.

Gainera, eta epaimahaiak aipamen berezia eginda, “Aurkeztutakoen onena” saria The New York Times egunkariari eman diote aurten.

Hogeita sei herrialdetatik 349 egunkari edo astekaritako 9.000 orri baino gehiago aurkeztu dira aurtengo lehiaketara (lehiaketan parte hartzeko 6-25 dolar artean ordaindu behar izaten da orriko).

Sari gehien batu dituztenen artean, El Mundo eta El País egunkariak aurki daitezke (53 sari bakoitzak). Baina hauek ez dira Espainiako irabazle bakarrak izan. Honako hauek ere jaso dute epaimahaikideen oniritzia: As, El Mundo Deportivo, El heraldo de Aragón, Expansión Gaceta Universitaria, La Vanguardia eta La Voz de Galicia.

Euskal Herrian argitaratzen diren egunkariek ere izan dute tokia sarituen artean, eta horrela, El Correo egunkariak Zilarrezko sari bat eta 18 Aipamen berezi batu ditu; Deia egunkariak, bestalde, 2 Aipamen berezi.

Epaimahaian lanean ibili direnen artean bazegoen euskaldun bat: Javier Zarracina bizkaitarra, El Correo egunkariko infografia departamentuko zuzendaria.

SND elkarteak ez ditu bakarrik paperean inprimatzen diren egunkariak kontuan hartzen, izan ere, beste lehiaketa bat ere badu martxan: The Best of New Media Design Competition. Honen eta aurreko guztiaren berri ere izango duzu snd.org gunean.