Le Monde Diplomatique aldizkariaren webguneak arazoak ditu
Ignacio Ramonet eta Philippe Rivière aldizkari prestigiotsu honen zuzendariek sinaturiko idatzia argitara eman dute beraien webgunean eta "Le Monde diplomatique" Internet bidez jarraitzen dutenei paperezko edizioaren harpidetza egiteko eskatu.
Baina zergatik jarri dute martxan harpidetza kanpaina hau? Dirudienez, 2001. urtearen bukaeran egunkari eta aldizkari askoren edizio digitalak krisian daude. Eta, noski, tartean Le Monde Diplomatique-rena.
1995eko otsailean, duela zazpi urte, zenbait zerbitzu sarean jartzeko erabakia hartu zuten. Kritikoak izan ziren (eta dira) Interneteko zenbait konturekin eta, horrek, zenbait irakurleren galdera ekarri zuen: "Zergatik duzue webgune bat ez baduzue horretan sinisten?".
Gauzak honela, sinisteko ordua iritsi zitzaien. Ez "ekonomia berria" delako horretan, baina bai beraien nortasunarekin bat zetorren irakurleen beharretara egokituriko webgunean. Besteak beste, "Info-diplo" zerrenda sortu zuten. Eta zerrenda horren arrakasta itzela da, 150.000 lagunetik gora omen daude-eta bertan izena emanda.
Internet bidezko zerbitzuak mantentzeko, harpidetza-kanpaina jarri dute martxan. Hala ere webgunerako sarrera libre utzi nahi dute eta eskatzen dutena da paperezko ediziorako harpidetza egitea: norbera harpidetzea edo familiako norbait, lagunak, elkarteak, etab.
Helburua 2002. urtearen bukaeran 5.000 harpide berri egitea da.
Irakurri gehiago hemen: http://www.monde-diplomatique.fr/abo/
Aipatutako webguneko edukiak bakarrik frantsesez eta ingelesez egon arren, LE MONDE diplomatique hilebetekari interesgarriak paperezko edizioak beste hamar hizkuntzatan ditu.
Besteak beste, LE MONDE diplomatiquek València-n kaleratzen den edizio espainola ere badu, alea 4 eurotan saltzen da eta urte osorako harpidetza 44 euro balio du.
Interneten espainolez aurkitu dudan edizio elektronikoa edizio mexikarra da , baina ez dago eguneratua.