Teknologia albisteak

Europako e-administrazio onenak omen direnak

Erabiltzailearen aurpegia
Luistxo - Code & Syntax
2002-02-06 : 19:02

Europako Batasunak badu eGovernment izeneko programa bat. Administrazioa online jartzea, eta herritarrekin harremana telematikoki egitea (eta hobetzea) omen da koxka. Urtero sarean dauden ekimen administratibo onenen lehiaketa egiten dute. Aipamena merezi izan dutenen zerrenda publiko egin dute dagoeneko.

Bestalde, lehengoan Sustatun bertan iragarri genuen Frantziako web administratibo onenaren sariketa martxan zegoela. Atzo jakinarazi ziren sarituak, hain zuzen.

e-Government ekimenari dagokionez, hona hemen lehiaketara aurkeztu zirenen zerrenda. Euskal Herriko adibiderik ez dago. Espainiakoen artean, Administracion.es lotsagarria aurkezten ausartu ziren! (webgune hori disparate bat da, ikus, adibidez, nolako errepasoa ematen dion diseinatzaile batek beste gune honetan ).

Adibide on gisa aukeratu dituztenak, irabazleak nolabait esateko, hemen dituzue.

Denetarik dago, baina, noski, ez dugu denak berrikusteko aukerarik izan. Adibide batzuk.

  • Estoniako TOM: Herritarrek Parlamentura zuzenean lege-proposamenak egiteko sistema bat. Software librearekin egina, portzierto.
  • Edu365.com: Kataluniako Generalitateak hezkuntzarako bere Xtec bidez antolatutako irakaskuntza alorrerako atari bat.
  • Denuntziak online: Espainiako Polizia Nazionalarena... Salaketa saretik egiteko... inkietante samarra, ezta?
  • Residentie.net: Holandako Haga hiriko webgunea, herri-partaidetzarako eta diskusiorako. Arin eta praktikoa, itxura batean.

eGovernment programari buruzko berri gehiago hemen.

Frantziako sariak

Frantziako Gobernuaren ATICA departamentuak antolatutako funtzio publikoko Interneteko proiektu onenen sariketako irabazleak atzo eman zituzten aditzera (hemen dago zerrenda ). Sariketako kategorietako bat software librearekin egindako proiektuei zegokion. Alor horretan, hauek izan dira sarituak:

  • DRIRE: Industria sailaren Pays de la Loire eskualdeko gunea.
  • CNFPT: Centre national de la Fonction publique territoriale delakoa.

Erantzun

Twitter ikonoa  Facebook ikonoa  Sartu