Teknologia albisteak

Euskal Barrutia

Jose Miguel Campillo - Euskal Herriko Unibertsitate Barrutiaren aldeko Mugimendua

2002-01-30 : 14:01

Euskal Barrutiaren beharra
Euskal Herrian hiru barrutitan banatuta egotea ez da gaurko kontua. Horrek eragin du normalizatuta ez dagoen hizkuntza eta kultura oztopatzea. Unibertsitatearen kasuan kontu bera, nahi eta ezin. Horri irtenbidea aurkitu nahian EHUBAM elkarte berria.

Gaur egun Unibertsitatean aritzen garen euskaldunok hiru administrazio desberdinetan banaturik aurkitzen gara. Euskal Herriko sei unibertsitateak hiru barruti unibertsitario desberdinetan banaturik daude. Horrek normalizatuta ez dagoen gure hizkuntza eta kultura garatzeko aukerak mugatu eta oztopatu egiten ditu. Era honetan, banaketa administratiboak arazo estruktural asko sortzen dizkigu arlo desberdinetan.
Ikasle eta irakasle talde bat gabezi honetaz jabeturik, aspalditik Euskal Barrutiaren aldarrikapena egiten ari gara. Gure ustez, Euskal Herriko unibertsitate guztiak barruti bakar batean biltzea gure herria garatzeko ezinbestekoa da. Hori dela eta, mugimendu bat abiatu dugu: Euskal Herriko Unibertsitate Barrutiaren aldeko Mugimendua (EHUBAM)
Mugimendu honek helburu desberdinak dauzka. Alde batetik, Euskal Barrutiaren beharra gizarteratu nahi dugu. Beste aldetik, banaketa administratiboak sortzen dizkigun arazoak lehenbailehen konpondu behar direla uste dugu. Beraz, legalki bideratzeko aukerarik ez dagoenez, Euskal Barrutiaren gauzatze praktikoa burutu nahi dugu.