Azpeitiko informazioa, uztarria.com webgune berrian

Gauza dexente ditu webgune berriak, eta onena, klaro, bertara jo eta ikustea izango duzue. Webgunearen helburu zehatzak eta arlo teknikoa ere ikusgai dituzue bertan.

Dena dela, laguntza modura, hona atal nagusien deskribapen txiki bat:

• Albisteak. Azken orduko albisteak emango dira atal honen barruan, eta edozeinek izango du albisteak sartzeko aukera. Uztarria berak ere, sartuko ditu albisteak erredakziora iritsi eta landu orduko.
• Agenda. Egunean eguneko ekitaldien berri emango duena. Edozeinek izango du ekitaldien berri sartzeko aukera.
• Herri-aldizkaria. Uztarria berak ateratzen duen eta izen bereko herri-aldizkaria ere sarean egongo da buzoietara banatu bezin pronto. Ikusi, adibidez, orain egun gutxi banatu zen azken alea oso-osorik. Aurreko ale guztiak ere bertan daude, noski.
• Eztabaida. Hilero-hilero, uztarriak galdera bat proposatuko du, eta haren inguruan iritziak trukatzeko aukera egongo da. Historikoa gordeko da.
• Inkesta. Hilero-hilero, Uztarriak inkestatxo bat paratuko du webgunean. Inkesta historikoak ere gordeko dira.
• Ziberteka edo ziber-artxiboa. Herriarekin zerikusia duen informazioa pilatzen joango gara atal honen barruan. Momentuz, Uztarria berak atera dituen bi liburuxka biografikoak eta uztarriako kide izan zen Hegoaz Blai-ren ahaldenkari bat jarri ditugu sarean.
• Posta-zerrenda. Bi helburu eta funtzio beteko ditu posta-zerrendak. Batetik, azken orduko albisteak posta elektronikoz jasotzeko aukera izango du, berrien buletin funtzioa beteaz (sustatu.com honetan bezalatsu); bestetik, eztabaidak piztu eta bideratzeko tresna gisara ere funtziona dezan nahi dugu.

Uztarria Azpeitiko Kultur Koordinadorak landu eta garatu du webgunea, eta bera arduratuko da era berean, bere edukietaz. Horretarako, edukietaz arduratzeko alegia, beharrezko diren bitarteko guztiak jarriko ditu.

Komunikazio proiektu osoagoa

Hasiera-hasieratik herri-informazioaren alorra lantzea izan da Azpeitiko Uztarria Kultur Koordinadoraren helburuetako bat, eta horretarako atera zuen hilabetekari modura herri-aldizkaria ere. Dena dela, herri-aldizkaria berritzeko eta komunikazio proiektu zabalago baten beharra sumatzen genuen. Azterketa haren ondorioz sortu dugu webgunea eta erabat berritu herri-aldizkaria bera.

Eguneroko berri txikiak zabaltzeko, batipat webgunea erabiliko dugu hemendik aurrera. Hor kokatuko ditugu azken albisteak, eta gainera, herriko kultur talde, gizarte eragile, enpresa, erakunde publiko... eta abarrek sortzen dituztenez albiste hoiek, eurei eskainiko zaie informazio hori zuzenean sartzeko aukera. Uztarriak moderatzaile papera besterik ez du izango kasu hoietan. Berdintsu gertatuko da agendaren kudeaketarekin ere. Bestalde, sortzen den materiale guztiaren biltoki papera ere beteko du uztarria.com-ek.

Aldizkariak, aldiz, informazio landuagoa izango du helburu. Erreportaia selektiboagoak, iritzi sail zabalagoa, eztabaida sakonagoak, atzera begirako informazio gehiago... Hilabetekari denez gero, aproposagoa deritzogu horrelako informazio-mota lantzeari.

Azkenik, liburuxkak argitaratzen ere jarraituko du uztarriak. Iaz bi liburuxka (biografiko) atera zituen, eta aurten ere beste bi ateratzeko asmoa du.