EuskaraZ zerrendaren errautsetatik, bi zerrenda berritu
UEUk EuskaraZ zerrendaren jardunaren gainean hartutako azken erabakietatik ia hiru hilabete iragan dira (ikus http://groups.yahoo.com/group/euskaraz/messages ). Orduan EuskaraZ zerrenda suspentsoan utzi zen, eta UEUk hilabeteko epea hartu zuen gauzak bideratzeko eta hausnartzeko. Agindutakoa baino luzeago jo du prozesu honek ordutik hona. Tarte honetan, ordea, zenbait urrats eman ditugu, esandakoa betetze aldera.
Honako erabakiak gauzatu ditugu azken aste hauetan:
- EuskaraZ zerrenda moderatugabearen jarraipena ziurtatzea.
- UEU-ren ardurapeko zerrenda moderatu bat antolatzearena.
EuskaraZ zerrenda moderatugabearen jarraipena
Helburu hori betetzeko, zera egin du UEUk.
- Zenbait lagun eta erakunderekin harremanetan jarri EuskaraZ zerrendaren ardura inork hartu nahi ote zuen jakiteko.
- Proposamenak jaso helburu berarekin.
Azkenean, jasotako proposamenen artean EuskaraZ zerrenda moderatugabeak jarraipena izan dezan lana hartuko duena aurkitu dugu: Aitor Lopez de Aberasturi, Kaixo! atariaren arduraduna.
Honek zera esan nahi du praktikan:
- Harpideduden zerrenda emango zaio Aitorri (EuskaraZ-eko mezuak jasotzeko bakoitzak erabiltzen zuen e-posta helbidea).
- Helbide horiekin, zerrenda bat berrantolatuko du Aitorrek.
GARRANTZITSUA: Norbaitek ez balu nahi bere helbidea Aitor Lopez de Aberasturiren eskuetan utzi, ASTEBETEKO EPEA zabaltzen da orain EuskaraZ zerrendatik baja emateko. Prozesu horren amaieran gelditzen diren harpidedunen helbideak emango zaizkio Aitor Lopez de Aberasturi.
Jarraitu nahi dutenen helbideekin sortuko du zerrenda Aitorrek, eta konpromezu hauek hartu ditu horretarako:
- EuskaraZ zerrenda euskara hutsez mantenduko du.
- Mezuetan ez da lehen baino propaganda gehiago jarriko (edo ezer ez).
- Harpidedun horiei ez zaie zerrendaz aparteko beste informaziorik bidaliko.
UEU-ren ardurapeko zerrenda moderatua
Agindutako urrats hau betetzeko, UEUk bere barne jardueran Zerrenda Zerbitzua sortu du. Zerrenda Zerbitzuak UEUkideen barne-zerrendak (orokorrak eta sailkakoak) antolatuko ditu, eta zerrenda moderatu ireki bat ere sortuko du.
Zerrenda berriaren izena Uztargi izango da.
Azpiegituraren aldetik Uztargi, oraingoz, Yahoo Groups zerbitzuaz baliatuko da: http://groups.yahoo.com/group/uztargi . Aurrerago, etxe komertzial baten esku ez dagoen azpiegitura tekniko propioa izateko ahaleginetan badihardu dagoeneko UEU-k.
Uztargi-ren funtzionamendu irizpideak honako hauek izango dira. Uztargi zerrenda moderatua izango da.
UZTARGI-REN MODERAZIO IRIZPIDEAK
Uztargi zerrenda gai hauen inguruan jarduteko sortu da:
- Bere esparru zabalenean euskararen errealitateaz aritzeko, berau zabaltzeko edota zehazteko : hezkuntza, lan-mundua, administrazioa, produkzioa, erabilera....
- Euskalgintza eta euskararen inguruan suertatzen diren ekimenen berri izateko zein informarazteko.
- Kultur jardueren berri emateko zein jasotzeko.
- Irizpideekin bat egiten duten iritzi eta informazioaren elkar-trukaketarako.
Zerrenda moderatua da eta gai horietara atxikitutako mezuak soilik onartuko dira, mezuak moderatzaileen galbahetik iragazi ondoren.
Gai horiekin zerikusi zuzen-zuzena ez duten mezuak ere onartzen dira, harpidedunen interesekoak direla uste bada. Adibidez, informazio edo laguntza trukea helburu duten mezuak ere onartuko dira, ekarpen interesgarritzat jotzen badira. Era berean, zerrendakideen arteko harremana estutzeko balio dezaketenak onartuko dira, noski. Esate baterako, "Londresera joan nahi nuke eta kontaktuak..." edo "zerrendakideen arteko bilkuratxo bat egitekotan...".
Uztargi zerrendaren jardunean, harpidedunek elkarrenganako gutxieneko errespetu batekin jokatu eta idatzi beharko dute. Mezuak zerrendaren gaiei atxiki arren, ez badira errespetukotzat jotzen, ez dira banatuko.
Era berean, ez da onartzen artxibo erantsirik mezuetan. Kasu honetan, mezuak ez dira berez atzera botako. Galbahe automatiko batek artxibo erantsiak ezabatu egingo ditu. Birusen zabalkundea ebitatuko da honela.
Euskarazko zerrenda da Uztargi. Erdaraz idatzitako mezuak ez dira onartuko. Euskarazko mezu batean, beste nonbaitetik jasotako erdarazko testuren bat agertzen bada, onargarria da mezu hori, baina erdarazko testuaren gaineko komentarioak eta jarduna euskaraz izango da.
Iristen diren mezuak irizpideotara moldatzen diren edo ez, moderatzaileek beraiek erabaki beharko dute hori, irizpideen izpirituarekin, harpidedunen nahiekin eta UEUren interesekin zintzo jokatuz. Ez dira egongo behartuta erabaki horien azalpen publikoak ematera. UEUren aurrean bakarrik erantzungo dute.
Mezuen iragazpena kontrolatzeaz gain, moderatzaileen zereginak izango dira beste hauek ere:
- Adierazpen askatasuna ziurtatzea zerrendan, errespetuzko mezu-trukea bermatuz
- Sor daitezkeen arazoei aurre egin: adibidez, sabotaje saiakerak, edo spamatzaile eta erasotzaileen infiltrazioak.
- Zerrendaren etorkizunaz arduratu, ez dadin hil.
Jarraibide hauek jala eskatzen badute, mezuak moderatzeaz gain, moderatzaileek indarrean dauden harpidetzak moztu ahal izango dituzte.
Moderazio irizpideak ez dira zerrendako eztabaidagaitzat hartzen. Harpidedunak libre dira jarraibide hauekin ados ez egoteko, eta, hortaz, libre dira halaber beste posta-zerrenda batzuk sortzeko, zuzenagoak iruditzen zaizkien jarraibideekin (Interneten doako baliabiderik ez da falta halakorik egiteko).
UEUren Zerrenda Zerbitzuak unean-unean enkargatuko dio moderazioa egoki irizten dionari.
Uztargi-n harpidetzeko
Uztargi-n harpidetzeko, lehenengo eta behin, EuskaraZ eraberrituarekin bezala jokatuko dugu.
ADI BERAZ, HONI: ASTEBETEKO EPEA irekitzen da jarraitu nahi ez duenak baja eman dezan EuskaraZ zerrendatik. Prozesu horren amaieran gelditzen diren harpidedunen helbideak Uztargi zerrendan apuntatuko ditugu, galbahe batetik iragazi ondoren. Zera izango da galbahe hori:
- Yahoo Groups-eko harpidetza hobespenen artean, Digest formatuan jasotzen zutenak EuskaraZ (eguneko mezu guztiak batean bakarrik bildurik), Digest formatuan harpidetuko ditugu Uztargi-ra.
- Yahoo Groups-eko harpidetza hobespenen artean, "No Mail" eran harpidetuta zeudenak (alegia, web bidez irakurtzen zituzten mezuak mezurik jaso gabe), ez ditugu harpidetuko Uztargi-ra. Horren ordez, gonbidapena jasoko dute.
Aukera dute harpidedunek gaurdanik hasten den astebeteko epean, beren harpidetza mota "No Mail" edo 'Digest" moduetan egokitzeko. Horretarako, Yahoo-n erregistratuta egon behar dute, bestalde. Esan dugun bezala, harpidetza eteteko aukera ere izango dute.
UEUko ordezkari gisa, EuskaraZ-ekin gertatutakoaz hausnarketa egitea tokatu zait toki batzuetan. Honako hauek Argia astekarian argitaratu nituen iritzi artikulu batean.
Eztabaida zerrendak: EuskaraZ eta beste
EuskaraZ zerrenda Interneteko euskara hutsezko lehen eztabaida-gunea izan da. 1996ko udazkenean sortu zuen Euskal Kulturaren Batzarreak (EKB), desagertutako Eusnet zerbitzariaren baliabideak erabiliz. 1999ko udaberrian, EKB desegiterakoan, EKBko Kitapen Batzordeak eta Udako Euskal Unibertsitateak EuskaraZ-en jardunarekin aurrera egitea erabaki zuten. 1999ko udatik, UEU izan da zerrendaren kudeatzailea (zerrenda ez moderatu honen kudeaketan Luistxo Fernandez, Iñaki Alegria eta hirurok ibili gara), eta Yahoogroups doako zerbitzu komertziala erabili izan du horretarako.
EuskaraZ zerrendak euskarari buruzko eztabaida, iritzi edo informazio trukaketa izan du oinarri eta xede. Baita erakunde, elkarte eta norbanako askoren informazio bide izatea ere.
zerrendaren krisia
Eztabaida zerrendaren ibilbidean, baliabide telematikoen erabileran legez, partehartzaile kopurua gorantz joan da. 221 zerrenda-kide hasieran, 564 gaur egun. Partehartzearena ere. Hala ere, honek ez du esan gura izan partehartze hauek bat egin dutenik zerrendaren xedearekin. Ondorioz, sortutako gaien anabasa, batetik, eta zenbait partehartzaileen mezuek, irain eta gustu txarreko bromak tarteko, zerrenda bera monopolizatu dutela, bestetik, egungo egoerara eraman gaituzte.
Zer erabaki
Zerrendaren helburu eta dinamikaren arteko desegokitasun honetan zerrendan bozketa gauzatu genuen. Parte hartze eskasa izan arren zerrenda ez-moderatuaren aldeko jarrera gailendu zen. UEUk zerrenda moderatu baten kargu baino ez zela egingo erabaki zuen.
Honen aurrean zer
Egun zerrenda bera izoztua dago. EuskaraZ zerrenda ez-moderatuaz, hots, inolako galbahe bako zerrendaz, nork kudeatu bila gabiltza. Jada, zenbait proposamen izan badugu. Berauek aztertu eta, aurki, martxan jarriko da berriro ere.
UEUk, ostera, bere zerrenda propioa eratuko du. Moderatua, baina. Eztabaidaren dinamikotasunaren pentzutan mezuak berrikusiko diren zerrenda. Euskalgintzan, euskal hezkuntzan (UEUren berezko esparrua) eta, oro har, euskararen eta euskal kulturaren munduan dabilen edonorentzako egina (norbanako zein elkartea). Laster da abian jartzeko. Eztabaida-gune eta informazio-gune izateko sortuko dugu.
Ibilbidearen ondorioak
Internet, baliabide telematiko moduan, berria da gure artean. Nahiz-eta munduaren ibilbidean gauzak abiadura handiz aldatu, gizarte osoa ez doa erritmo berean. Geurean, badira eskarmentu handiko erabiltzaile batzuk, gero eta gehiago, baina, oro har, eztabaida zerrenda (posta elektronikoaren bitartez egiten den iritzi edo informazio trukaketa), eta ez foro (webgune baten bitartez gauzatzen den eztabaida sinkronikoa), batean parte hartzen duten/dugun gehientsuenok, nolabait esatearrik, berriak gara. Beraz, ibilbide honetan, abian jarriko dugun eztabaida zerrendan ez errepikatzen ahaleginduko garen zenbait ondorio atera dugu:
Bestalde, honako onurak ere azpimarratu beharko lirateke:
Azkenik, honako baldintza hauek izan beharko lukete kontuan edozein zerrenda-kideek.