Teknologia albisteak

Bihar #Txiotesia2 lehiaketa egingo da

UEU

2014-11-17 : 11:14

UEUk kudeatzen duen Unibertsitatea.net atariak antolatuta, "Txiokatu zure tesia 6 mezutan" lehiaketa egingo da bihar bigarren urtez. Egitasmo honen helburua ikerlari euskaldunek egiten duten lana gizarteratzea da eta baita lan horren atzean dauden pertsonei izen-abizenak jartzea ere. Iaz 86 ikertzailek parte hartu zuten.

Lehiaketa twitter bidez egingo da BIHAR, eta parte hartzaileek lortu behar dutena da beraien tesia 6 txiotan azaltzea. Ikerlarien txioak epaimahai batek baloratuko ditu eta sari bi banatuko dira: 500€ eta 300€koa. Lehiaketa 2011/2014 urte bitartean tesia aurkeztutakoei edo tesia orain egiten dabiltzan ikerlariei dago zuzenduta. Ikusi araudia.

Honoko hauek osatuko dute epaimahaia:

Ainhoa Latatu (@tatutxiki): Doktorea mikrobiologian, UEUko Goi Mailako Prestakuntzaren arduraduna eta UEUkidea.
Iñaki Larrea (@ilarrea): Doktorea hezkuntzan, ikertzailea eta irakaslea Mondragon Unibertsitateko HUHEZI Fakultatean.
Itziar Aretxaga (@ItziMex): Doktorea astrofisikan, ikertzailea eta Mexikoko Astrofisika, Optika eta Elektronikako Institutu Nazionalaren Astrofisika Saileko burua.
Kike Amonarriz (@KikeAmonarriz): Euskal Filologoa, soziolinguista, ikertzailea eta telebista aurkezlea.
Koldo Garcia (@koldotxu): Doktorea genetikan, ikertzailea UPV/EHUn eta UEUkidea.