Krisi ekonomikoa: Ekin garai berriari

Ez dut ekintzaileen gorazarrea egin nahi, orain horren modan dagoen moduan. Baina bai aurrera egin nahi duten pertsona horien apologia. LAnaren zain egon ez eta lana sortzearen alde egiten dutenak, dena-delakoa egiten, auzoan taberna ezberdina irekitzetik nekazaritza ekologikora, punta-puntako ingeniaritzatik pasata.

Eta nago bide horretan funtsezkoa dela orain arteko estereotipoak apurtu eta ohiko enpresari eta langileak elkarlanean jardutea. Dela kooperatiba moduan edota mozkinak eta ardurak banatzen dituen enpresa moduan. Kontua bertan lana egiten duten guztien aldekoa izango den formula bat bilatzea da.

Hau erdiesteko nahietaezkoa iruditzen zait konplexuak gainditzea. Patronalak eta sindikatuek elkarlanean jardun behar dute. Jarri dezatela ohiko erretolikarekin publikoan, nahi badute, batak besteari errua leporatuz, baina sortu ditzatela lan-taldeak pribatuan eta elkarlanari ekin, ausart. Patronalak badaki enpresa kudeaketaz jakin beharrekoa. Eta sindikatuak langileak ditu.

Enpresa, kooperatiba, irabazi-asmorik gabeko elkartea. Deitu nahi duzun moduan. Baina lana emango duten "gauzak" behar ditugu. Eta ez zaizkigu kanpotik etorriko hori ematera; eta etortzen bazaizkigu Eurovegas moduko pagotxak izango dira. Guk geuk egin behar. Eta horrela izanik, egin dezagun era arduratsu batean, guztiontzat positiboa izango den horretan.

Gainerakoan, lehengo lepotik burua. Enpresariak kabroi batzuk eta langileak zorriak, edo alderantziz, nahi duzun moduan. Edo joan zaitez Alemaniara...