Teknologia albisteak
3

Spotbros aplikazioa: Whatsapp -aren ordezko izateko jaio (omen) zena

Erabiltzailearen aurpegia
2012-07-11 : 14:05

Duela pare bat aste irakurri nuen Spotbros aplikazioari buruzko albiste bat: Whatsapp-aren lehiakide zuzen eta potentea izango zela zioen. Proba egin nahian, deskargatu egin nuen, baina geolokalizazioa erabiltzen zuela ikusita, kendu egin nuen. Duela egun bat berriz agertu zen Spotbros ordenagailuko pantailan, eta amore eman nuen: geolokalizazioa aktibatu eta proba egin nuen ea zer moduz dabilen.


Argazkiak.org | Spotbros aplikazioa © cc-by-sa: m_unanue

Whatsapp-ak bezala, bi pertsonen edo gehiagoren arteko elkarrizketa ahalbidetzen du Spotbros-ek, doan. Aplikazio honen berrikuntza eta iraultza, baina, Shout eta Spot izeneko elementuen ondorio lirateke. Lehenengoaren bidez, zure inguruan dauden -eta Spotbros erabiltzen duten- horiekin elkarreragin ahal izango duzu. Hau da, ezagutzen ez duzun herri batean bazkaltzeko leku baten aholkua nahi baduzu, Shout bat bidal dezakezu, eta ingurukoek erantzun diezazukete, ezagutu ez arren, eta elkarren telefono zenbakiak eduki ez arren.

Spotak, berriz, taldeko eztabaidetarako sortu dituzte. Edozerri buruzkoak izan daitezke. Aplikazioak bizi zaren zonaldean dauden taldeak identifikatu eta erakutsiko dizkizu, eta zure interesekoak badira, euren jardunera batu zaitezke.

Whatsapparen aldean, sozialagoa izan nahi omen du aplikazio honek, eta dituen funtzioak ikusita baietz esan daiteke, asmoak ondo bideratu dituztela. Baina aplikazio baten sozialtasuna edo, duen erabilgarritasunaren eta zabalkundearen araberakoa ere badela esango nuke, eta horretan hanka motz dabil Spotbros. Aplikazioaren etorkizun oparoa iragartzen zuten artikulu horiek otsailakoak dira gehienak -ordurako 8.000 deskarga izan zituen-. Nik instalatu dudanean, baina, ikusi dut nire kontaktuetatik bik bakarrik daukatela euren telefonoetan. Benetan Whatsapp -aren lehiakide izango balitz aspaldi hartuko zion aurrea. Hau da, otsailaz geroztik denbora izan dute sortzaileek aplikazioari publizitatea egin eta ahalik eta gehien zabaltzeko, eta horren ordez, basamortua gailendu dela Spotbros -en bidean.

Gauzak horrela, telefonotik kentzea erabaki dut, batetik, geolokalizazioarenak susmo txarrak sortzen dizkidalako betidanik, eta, bestetik, helburu onetarako oso ona izan daitekeen arren, asmo txarrak dituztenentzako ere tresna ona izango dela uste dudalako.

Erantzunak

2012-07-11 : 14:23

Zenbat eta zenbat honelako aplikazio? Zaila da "originala" denari gailentzea... lehenengo izateak duen garrantzia ikaragarria da.

Interesgarria artikulua, ez nuen eta aplikazio honen berri.

2012-07-16 : 14:03

TigerText aplikazioaren berri izan dut garu. Hauek segurtasunean dira sendo, edo hori da behintzat diotena. http://www.tigertext.com/ Probatu beharko.

2012-07-16 : 14:11

Nik ere frogatu nuen, urte hasieran. Batez ere aplikazioa Bizkaitarrek egina dalako (Workmunity eta Karmacracy atariak bezala), baina "desertua" hitzak oso ondo adierazten du niretzako bertan dagoen jende kopurua. Omen danak Tuareg eta ez dira geldi egonen.

Erantzun

Twitter ikonoa  Facebook ikonoa  Sartu