Teknologia albisteak
2

Josemari Lasaren #Haika aforismoak: guztientzako gonbitea

Erabiltzailearen aurpegia
2013-06-26 : 11:01
Josemari Lasa Barakaldoko Udal Euskaltegiko langile bat da, eta Twitterren ohitura zehatz bat dauka. Aforismo itxurakoak botatzen ditu, #haika traolarekin goizero. Galdera egin nion, ea bere traola besteok ere erabil genezakeen, guk ere gure #haika traketsak txiokatzen ausartzekotan, eta baietz berak, ohorea izango dela besteok ere honelakoak idazten hastea :-)

Bide batez, Josemariri eskatu diot egiten duena definitzea, eta honako lerro hauek bidali dizkit e-postaz:

***

#haika-k definitzea ez zait erraza egiten. Nik, egia esan, Arantzazukoa bezalako egutegiak nituen gogoan, egunean egunean orriak aletuz urtea arintzen zuten haien tankerakoa. Gogoan neukan, halaber, horrelakoak atera zituztela bere garaian Akademia Sekretuak eta Idazleen Elkarteak eta oso gustuko izan nituela. Twitterren, eguna hasteko, jendeak ametsak kontatzen zituen, abestiak eta argazkiak partekatu... Egunari ekiteko era gozo horri ekarpentxo xumea egite aldera hasi nintzen #haika-k idazten.

#haika izena ipintzeko orduan, hitz-jolas errazera jo nuen haikuak #haika bihurtuta; #haika hauek, ostera, ez dute egitura finkorik, mikroipuinak dira batzuetan, hitz-jokoak bestetan, epitafioak ere bai zenbaitetan. Finean, egunero lanean hasi aurretik, sareratzen dudan entretenimendu modu bat, egutegi-orritxo bat.

Hasiera twitterren izan zuten, formatu polita iruditu zitzaidan, iragankorra izateak eta ideia bat hain arropa gutxirekin jantzi beharrak enkantu handia baitu.

Lehengo batean @luistxo -k galdetu zidan ea edonork idatz zezakeen #haika traola erabiliz, ilusio handia egingo lidakeela erantzun nion, jakina. Beraz, ideiatxo polit edo itsusiren bat, ipuintxoren bat, aho-korapiloren bat baduzu, prest gaituzu zure #haika txioa adi-adi entzuteko txori urdinen erresuma honetan.

***

Ideia bat izateko, zer diren aforismo hauek horra Josemari Lasaren #haika batzuk:

Ezertxo ere ez zuten aurkitu galaxia urruneko planeta hartan. Luma bat soil-soilik. #haika

Igorri  Igorri  eta horri orri hori hori. #haika

Bere ametsetako gizona topatuko zuelakoan, ezpainak margotu eta soineko dotoreena jantzi zuen oheratu baino lehen. #haika

Etsipenak jota hitzak zpldu, erdi bitu eta ba rre i zituen a tu olerkariak. #haika

Bere adorea saritzeko hainbat domina jasotako soldadua beldur zen ezpainak gorriz margotzeko. #haika

Tontoak lapikoa galdu zuen. Itsuak aurkitu, eta berba piloa gorde zuen bertan. #haika


Ausartuko ote gara besteok ere halakoak egiten? Nik xaxatu dudanean, beharko zerbait bota! Baina ez nazazue bakarrik utzi Josemarirekin, animatu beste norbait ere, bale?

Erantzunak

2013-06-26 : 21:36

Jozulinek be egin izan dittu halakorik. Radixuan nebixanian behiñ baiño gehixagotan erabilli izan dittudaz nik bere "Haiku Kaiku" seriekuak. Adibidez:
http://blogak.com/jozulin/haiku-kaiku-iii
http://blogak.com/jozulin/haiku-kaiku-v
http://blogak.com/jozulin/txabola-basoan-haiku-kaiku-vi-zorion-apurrak-v

2013-06-27 : 11:05

Atzo #haika traola izan zen nagusi ordu batzuz euskarazko txioen artean. Eguneko sailkapenean ez zuen irabazi, baina hor goian geratu zen: http://umap.eu/joerak/2013-06-27

Horra egunean zehar jasotako batzuk:


Idurre Eskisabel ‏@idurreski
Lehertuta iritsi zen gailur garaienera. Begira jarri eta egiaztatu zuen dena oinpean zuela. Eta orain zer? galdetu zion bere buruari #haika

Josu Azpillaga ‏@jazpillaga
Motela zen oso. Jiratu zenerako, atzean zeukan berriz aurrea #haika

X10 ‏@X10tweet
Perspektiba hartzeko urrundu, atzeruntz jausi arte. #haika

Marijo Deogracias ‏@desplazatua
Udako oporren zain bata; hark oporrak hartzeko zain bestea. #haika

Joxe Rojas ‏@joxe
Erdaldun elebakarrak euskaraz diharduen euskaldun elebidunari: bilinguismo por favor #haika

Jarraipena badu, polita izan daiteke. Josemari Lasaren intentzioarekin egitekotan, gogoratu: goizean hoiz, egutegi tako zaharreko orria har ezazue birtualki eta irudimenez han irakurtzen duzuena #haika gisa bota.

Erantzun

Twitter ikonoa  Facebook ikonoa  Sartu