Eratu da euskal hedabideen eta Gipuzkoako Foru Aldundiaren arteko mahaia

Diru-laguntzak eta hitzarmen politikak, euskarazko hedabideetara bideratutako publizitatea, euskal hedabideen elkartea eta hedabideen behatokia izan dira mintzagai nagusiak. Hedabideetako ordezkariek adierazi dute, beren lana eta proiektuak aurrera ateratzeko baliabide gehiago behar dituztela, eta nahiko luketela Diputazioaren aldetik diru-laguntza politiketatik hitzarmen politiketara iragateko egon daitezkeen aukerak aztertzea. Agintarien esanetan, Diputazioak badu sostengu ekonomikoa handitzeko borondatea, baina aitortzen dute aurrekontuaren aurreikuspenak estuak direla eta borondate hori gauza litekeen aurrerago ikusi behar dela.

Aurrera begira, udazken hasieran berriz biltzekotan geratu dira, gaur mahaian hitz egindakoen jarraipena egiteko. Ordurako, gainera, herri ekimeneko euskal hedabideen elkartea osatuta egongo dela adierazi dute hedabideetako ordezkariek eta horrek mintzakide lanak erraztuko dituela azpimarratu dute. Alde biek nabarmendu dute bilera honen garrantzia, argi adieraziz hau epe luzera egin beharreko elkarlanaren hasiera dela.