Teknologia albisteak

Euskaren Ginkana: izena emateko azken egunak!

itsasolekuona

2013-11-30 : 09:18

Egun gutxi falta dira 3. Euskararen Ginkanari hasiera emateko. Oraindik izena emateko garaiz zabiltzate! Euskarazko proiektu bat duzue esku-artean? Webgune bat, proiektu komunikatibo bat, aisialdi taldea, euskaltegia, erabilera sustatzeko egitasmo bat... Guztiak dira euskararen aldeko lanean ezinbestekoak, eta hori saritu nahi du aurtengo Euskararen Ginkanak.

Abenduaren 3an hasiko da Kutxa Ekoguneak Euskaltzaleen Topagunearekin elkarlanean euskaraz eta euskararekin dibertitzeko antolatu duen lehiaketa. Taldeek, egun horretara arte izango dute izena emateko aukera. 6 astez, astero internet bidezko proba bat erantzun beharko da, eta horietan puntuazio altuena lortzen duten 4 taldeak pasako dira Donostiako San Telmo Museoan urtarrilaren 25ean ospatuko den finalera.

Hizkuntza aniztasuna izango da aurtengo gaia eta beraz, gainditu beharreko probak eta galderak munduko zein Euskal Herriko hizkuntza aniztasunari lotuak izango dira.

Izena ematea datorren asteartean, abenduaren 3an amaituko da. 4-6 laguneko taldea osatu eta webguneko formularioa betetzea da lehen pausua. Ondoren, talde bakoitzak bere burua eta babestu nahi duen euskararen aldeko egitasmoa aurkeztu beharko ditu bideo labur batean. Urtarrilaren 9rarteko epea egongo da bideoak igotzeko.