Forvo-ren interfazea euskaraz orain
Forvo ahoskatze gida bat da, Donostian sortua baina mundu guztian zabaldutakoa. Ez dakizula Chris Froome-ren abizena nola esan behar den? "from" ala "frum" ? Forvon daukazu soluzioa, entzun: Chris Froome. Aldi berean, kolaborazio bidezko zerbitzua denez, norberak ere ahoskatu ditzazke hitzak bere hizkuntzan. Kazetari espainiar askok erabili beharko luketen tresna, dudarik gabe, batez ere euskarazko izenekin.
Besteen grabazioak entzutea ongi dago, baina interesgarriagoa izan daiteke gurea bezalako hizkuntza batentzat gure hitzak edo izenak nola ahoskatzen diren munduari azaltzea. Horretarako, nahikoa da Forvon izena eman eta ordenagailuari lotutako mikrofono batekin hitzak grabatzea. Webguneak berak egiten du grabaketa eta segundu batzuk besterik ez dira behar.
Eskaerak ere badira, norbaitek egindakoak, ez dakielako nola ahoskatzen den Osakidetza euskaraz, adibidez. Une honetan 600 eskaera baino gehiago daude euskal hiztun baten zai, norbaitek behar hori izan duelako. Lagunduko diogu? Nola ahoskatzen da Osakidetza?
Argazkiak.org | Osakidetza forvon © cc-by-sa: garaolaza
Hizkuntza askotan daude grabazioak Forvon, bai handi eta bai txikiak. Gainera, kasu askotan grabazio bat baino gehiago dago, sarritan munduko toki desberdinetan egindakoak eta horri esker ikusi dezakegun nola esaten duten elevator hitza Estatu Batuetan edo Erresuma Batuan.
Aspaldidanik zegoen egiteko lan bat abuztuan egin dute: interfazea euskaratzea. Donostiatik sortutako proiektua izateko kostatu zaie, baina orain aitzakiarik ez duzue, hartu eta hasi ahoskatzen, jendea falta da eta!
Forvo ahoskatze gida oso tresna erabilgarria izan daiteke hizkuntzen irakaskuntzan