Teknologia albisteak

74 bertsolarirekin abiatuko da Gipuzkoa Bertsotan, Txapelketarako sailkapen fasea

GBE

2015-04-30 : 11:35

74 bertsolarik hartuko dute parte Gipuzkoa Bertsotan saio sortan, irailaren 20an hasiko den Gipuzkoako Bertsolari Txapelketarako sailkapen fasea dena. Hilabeteko epean 24 saio jokatuko dira eta bertsolariek bina saiotan kantatuko dute. 30 bertsolarik lortuko dute Gipuzkoako Txapelketarako sailkatzea. Gipuzkoa Bertsotan maiatzaren 9an hasiko da Astigarragan eta ekainaren 6an amaituko da, Ataunen.

Irailaren 20an hasiko da Gipuzkoako Bertsolari Txapelketa eta abenduaren 20an amaituko da, Donostian egingo den finalarekin. Hori baino lehenago hitzordu garrantzitsua dugu bertsozaleok, maiatzaren 9an martxan jarriko baita Gipuzkoa Bertsotan, txapelketarako sailkapen fasea.

74 bertsolarirekin abiatuko da Gipuzkoa Bertsotan. Horrez gain, 19 lagunek osatzen dute epaile taldea eta 9k gai-jartzailearena. Puntuaziorik altuen eskuratzen duten 30 bertsolariek lortuko dute udazkenerako sailkatzea. Dagoeneko, 13 bertsolari daude zuzenean sailkatuta Gipuzkoako Bertsolari Txapelketarako. Horiei Gipuzkoa Bertsotan sailkapen fasean sailkatzen direnak gehituko zaizkie.

Hilabeteko epean, maiatzaren 9tik ekainaren 6ra, 24 saio izango dira Gipuzkoan barrena, 12 herritan. Izan ere, herri bakoitzak bi saio hartuko ditu. Bi itzulitako txapelketa da Gipuzkoa Bertsotan. Bertsolariek bitan kantatuko dute, batean goizez, bestean arratsaldez. Bi saioetako puntuen batuketak emango du bertsolari bakoitzaren osoko puntuazioa eta horren arabera osatuko da sailkapena.

Saioetako sarrerak egun berean salduko dira aretoan. Leihatila 10:00etan eta 16:00etan zabalduko da. Ohi bezala, Bertsozale Elkarteko bazkideek eta 16 urtetik beherakoek prezio berezia izango dute sarreretan, 4 euro saioko. Halaber, eguneko bi saioak prezio berezian ikusteko aukera izango dute, 6 euroan eguneko bi saioak. Gainerakoentzako, saioko sarrera 6 eurokoa da eta eguneko bi saioaka ikusteko, 9 euro.

Webgune honek sailkapen fasearen informazio osoa eta eguneratua eskainiko du. Horrez gain, sare sozialetan Gipuzkoako Bertsozale Elkartearen profilen bitartez segimendua egingo zaio Gipuzkoa Bertsotani Twitterren (#GBT15 traola erabiliko da) eta Facebooken.

GIPUZKOA BERTSOTAN. EGUTEGIA

(Egutegi osoa, bertsolari, areto eta ordutegiekin hemen aurkituko duzu)