Teknologia albisteak

Urola Erdiko herritarrek aukeratutako egitasmoak gauzatzeko bilerak hasi dira

cmartin

2014-04-01 : 17:06

Gipuzkoako Foru Aldundiak, Partaidetzazko Aurrekontuen ekimenaren bidez, 500.000 euro jarri zituen 2013an Urola Erdiko biztanleek erabakitzeko zertan inbertitu. Parte hartze prozesu baten ondorioz, zazpi egitasmo aukeratu zituzten eskualde horretako herritarrek foru aurrekontuen diru hori inbertitzeko. Egitasmoak aurten gauzatuko dira eta horren jarraipena egiteko bilerak hasi dira. Hilaren 2an eta 3an, Azpeitian izango dira.

Urola Erdiko biztanleek eta udalek Partaidetzazko Aurrekontuen esperientzian parte hartu zuten 2013an. Horren arabera, Foru Aldundiak 500.000 euro utzi zituen herritarren esku. Prozesu parte hartzaile baten bidez, zazpi egitasmo lehenetsi zituzten eskualde horretan. Egitasmo horiek aurten gauzatuko dira eta, herritarrek hala eskatuta, prozesu horren jarraipenean ere parte hartu nahi dute. Horretarako, jarraipen batzordeak osatu dira eta egitasmo horietako batzuk nola gauzatuko diren erabakitzeko lehen bilerak lotuta daude.

Eskualdeko historia berreskuratu eta balioan jartzeko plangintzari buruzko bilera hilaren 2an, asteazkenean, egingo da, Azpeitiko udaletxeko batzar aretoan, 18:00etan.

Hilaren 3an, ostegunean, 18:00etan, Oroimen historikoa lantzeko egitasmoa gauzatzeari buruzko batzordea egingo da.

Partaidetzazko Aurrekontuen ekimena iaz jarri zuen martxan Gipuzkoako Foru Aldundiak. Urola Erdian egin zen esperientzia pilotua. Foru Aldundiak 2014ko aurrekontuetatik 500.000 euro jarri zituen Urola Erdiko herritarren esku, diru hori non inbertitu erabaki zezaten. Parte hartze prozesuan aritu ziren eskualde horretako biztanleek zazpi egitasmoz osatutako zerrenda lehenetsi zituzten.

Burujabetza energetikorako plangintza egitea: 65.000 euro
Oroimen historikoa lantzea: 22.000 euro
Haur eta gazteen parte-hartze programa osatzea: 45.000 euro
Eskualdeko historia berreskuratzeko plangintza egitea: 30.000 euro
Baserri-bideak konpontzea: 150.000 euro
Mendietako bidezidorrak txukuntzea: 110.000 euro
Lasao-Zestoako trenbidearen egokitzapen lanak egitea: 78.000 euro

Partaidetzazko Aurrekontuak 2015

Aurten ere, Gipuzkoako Foru Aldundiak abian jarri du Partaidetzazko Aurrekontuen ekimena, eta Urola Erdiak bigarren urtez parte hartuko du. Beste 500.000 euro izango dute eskualderako eta herrietarako onuragarriak diren egitasmoetan inbertitzeko. Urola Erdiaz gain, Tolosaldera, Bidasoaldera eta Oarsoaldera ere hedatu du ekimena Foru Aldundiak.