Jose Mari Elortza kimikariak jasoko du "2011 Elhuyar Merezimendu Saria"
Bihar, ostegunez, banatuko dituzte 2011ri dagozkion CAF-Elhuyar Sariak, Donostiako San Telmo museoan. 18:00etan hasiko da ekitaldia eta, Merezimendu sariaz gain, beste hiru sari banatuko dituzte: Dibulgazio-artikulu orokorraren saria, Egilearen doktore-tesian oinarritutako dibulgazio-artikuluaren saria eta Zientzia-kazetaritzaren arloko saria. Gazteei zuzendutako zientzia-narrazioaren saria eman gabe uztea erabaki du aurten epaimahaiak.
Bi epaimahaik aztertu dituzte aurtengo ediziora aurkeztutako lanak. Gazteei zuzendutako zientzia-narrazioak kategoriara aurkeztutako lanak honako pertsona hauek epaitu dituzte:
- Yolanda Arrieta idazlea eta haur- eta gazte-literaturan aditua.
- Jesus Mari Olaizola Txiliku, idazlea, Biologiako irakaslea eta haur- eta gazte-literaturan aditua.
- Josu Waliño, Elhuyar Fundazioko proiektu-zuzendaria eta gazteentzako ipuinen idazlea.
Gainerako kategorietara iritsi diren lanak, berriz, honako lagun hauek epaitu dituzte: - Itziar Alkorta, Zuzenbide Zibileko irakaslea eta bioetikaria.
- Jose Maria Pitarke, CIC-NanoGUNEko zuzendaria.
- Juan Ignacio Pérez Iglesias, Kultura Zientifikoko EHU-BFA katedrako zuzendaria.
- Txema Ramírez de la Piscina, Euskal Herriko Unibertsitateko Kazetaritzako irakaslea .
- Jose Mari Rodriguez Ibabe, Elhuyar Fundazioko lehendakaria eta CEITeko ikertzailea.
Guztira 48 lan aurkeztu dira 2011ko CAF-Elhuyar sarietara: 23 lan, dibulgazio-artikulu orokorraren kategorian; 14 lan, egilearen doktore-tesian oinarritutako dibulgazio-artikuluaren kategorian; 9 lan, zientzia-kazetaritzaren kategorian; eta, azkenik, 2 lan gazteei zuzendutako zientzia-narrazioen kategorian.
Bestalde, aurtengo Merezimenduko saria Jose Mari Elortza kimikari eta EHUko irakasleari ematea erabaki du Elhuyar Fundazioaren Patronatuak, bere alorretik euskarari eta euskal kulturari egindako ekarpenagatik.
Erantzun
Sartu