Erreakzioak Jaurlaritza "I need Spain" kanpainara batu ondoren

Jaurlaritzaren prentsa-ohar ofizialak azaltzen duenez 300.000 euro ordainduko ditu Jaurlaritzak EAE I need Spain lelopean sustatzeko Europan, bereziki Frantzian, Alemanian eta Erresuma Batuan. "Euskadirekin zuzeneko aireko konexioak dituzten herrialdeetan garatuko da sustapena" prentsa oharraren arabera. ABC egunkariak herenegun zekarren albistean Patxi Lopezen hitz hauek ekarri zituen:

Atzerrian bizi den jende askok agian ez gaituzte zehatz-mehatz kokatzen, eta nazioartean ospe handia duen España markarekin erlazionatzen bagaituzte, turista gehiago erakar ditzakegu.

I need EH, I need Independence

Ekimenak kritikak jaso ditu alderdi abertzaleen partetik, eta sarean ere egon dira erreakzioak. Facebooken honako hauek arakatu ditugu:

• I don't need Spain orrialdea (Ez dut Espainia behar)
• Necesito España, más lejos taldea (Espainia behar dut, urrunago)
• I need EH taldea (EH behar dut)
• I need Independence orrialdea (Independentzia behar dut) eta, horrekin lotuta, webgunea: ineedindependence.com (hemen pantaila irudia badaezpada) ingelesez independentziaren aldeko arrazoiak ematen.

Argazkiak.org | Sukaldariak, I need Spain kanpaina © cc-by-sa: herri.admin

Sukaldarien argazki hau Zuzeun ikusi dugu, eta argazkiarekin batera hauxe dio Iñakito Garayk: "Batek jakin sukaldari hauek aurrez ezagutzen ote zuten iragarkiaren leloa". Bada, Pedro Subijanaren hitzetan ez zieten leloaren berri eman:

Ez ziguten azaldu kanpaina nolakoa izango zen. Hirurok elkarrekin argazki bat ateratzeko besterik ez ziguten eskatu.

Lehendakariaren hitzetan Euskadi mapan kokatzen laguntzeko beharrezkoa da Espainiarekin batera iragartzea. Argumentu horrekin gehitu zioten Espagne izena Pays Basque izenaren azpian Euskaltel txirrindulari taldearen ekipamenduari. Subijanaren hitzetan, sukaldari euskaldunak aski ezagunak dira munduan Espainian daudela gogoratu beharrik gabe:

Euskal sukaldaritza aspaldi kokatu zen nazioartean, bere kabuz.

Jaurlaritzaren erantzuna kritikei

Idoia Mendiak esan du "Euskadi Espainiatik askatu nahi duenari bakarrik" ez zaiola gustatzen kanpaina. Gai hau jorratu du gaurkoan Anjel Lertxundik bere Berriako Hitz beste atalean:

Esaldiaren branka erakustea ahaztu zaio: "Euskadi Espainian mantendu nahi duenari bakarrik gustatzen zaio kanpaina".